MOUZ го зазеде првото место на светската ранг-листа на HLTV по триумфот на IEM Beijing. Тимот во Кина не загуби ниту една мапа, а со тоа е прв и на двете најважни ранг-листи, откако крајот на октомври веќе стигна до врвот на глобалната VRS листа.
Тоа е прв пат од јуни 2024 година MOUZ да води на двете листи. Од тогашниот состав во тимот останале само Dorian „xertioN“ Berman и Ádám „torzsi“ Torzsás.
Титулата во Пекинг е втора за MOUZ оваа сезона, по BLAST Bounty Season 2 во август. Тимот има и две второпласирани позиции (BLAST Open Porto и ESL Pro League 24), како и бронза на PGL Masters Bucharest.
На ранг-листата MOUZ има 912 бода, два повеќе од второпласираниот FURIA (910). Следат Team Vitality со 836 и Spirit со 777 бода. Aurora Gaming, каде игра македонскиот играч Дамјан „kyxsan“ Стоилковски, е на петто место со 552 бода.
MOUZ следно настапува на BLAST Rivals, својот последен турнир пред Major во Сингапур. На 11 ноември го игра мечот против G2.
